EACC yapokea kesi 300 za utapeli ndani ya miezi nane.
Tume ya Maadili na Kupambana na Ufisadi (EACC) imesema kwamba katika mwaka wa 2024 pekee, imepokea kesi 300 za matapeli wanaojifanya kuwa maafisa wa EACC na ambao wamekuwa wakiomba rushwa kutoka kwa maafisa wa serikali kuu na za kaunti, wakuu wa shule, na wamiliki wa biashara binafsi wakidai kuwa wanachunguza tuhuma dhidi yao.
Akizungumza huko Diani, Kaunti ya Kwale, msemaji wa EACC Eric Ngumbi alisema kuwa matapeli hao wamekuwa wakidai pesa ili kuwaondolea waathiriwa madai ya kesi za ufisadi ambazo hazipo.
Hii inafuatia kukamatwa kwa washukiwa watano huko Kitui waliovamia nyumba ya Mkurugenzi wa Mapato wa Kaunti ya Kitui na kudai rushwa kutoka kwake wakidai kwamba anahusika katika kesi ya ufisadi.
EACC inasema washukiwa hao pia wanaendesha ofisi haramu katika kaunti wakijifanya kuwa mawakala wa tume.
