Wafanyakazi na wateja wa AMACO Roho mkononi Mahakama ikiamuru ifungwe.

Mahakama Kuu imeamuru kufungwa kwa kampuni ya Africa Merchant Assurance Company (Amaco) ambayo inahusishwa na Naibu Rais William Ruto kutokana na kushindwa kulipa madeni.

Kampuni hiyo ambayo imekuwa ikihudumu kwa miaka 22, ilishindwa kulipa deni ya KSh 10.2 milioni za watu sita ambao waliwasilisha kesi mbele ya Jaji Margaret Muigai wakidai kampuni hiyo ilikataa kulipia gharama yao ya ajali.

Walalamishi hao pia walidai kupewa hundi feki na kampuni hiyo ya bima.

Jaji Muigai aliamua kuwa kampuni hiyo ifungwe chini ya ulinzi wa mwenye hisa kubwa.

Sita hao ni ikiwemo Anisia Muthoni, Elizabeth Karithi, Faith Muthoni, Silas Kinoti na wengine wawili ambao hawakutajwa.

Katika taarifa tofauti, Amaco ilijitetea dhidi ya kufanya makosa katika zabuni ya KSh 187 milioni ya Kaunti ya Nairobi.

Tume ya Maadili na Kupambana na Ufisadi (EACC) ilihoji kampuni hiyo kuhusiana na pesa walizodai kumlipa Gavana wa Nairobi kupitia kampuni inayohusiana na Amaco.

Tume hiyo ya kupambana na ufisadi ilitaka kujia sababu za kampuni hiyo kutumia sehemu ya KSh 20 milioni kulipa kampuni ya Arbab Auto Care, ambayo Amaco ilikua inafanya biashara nayo kutuma pesa katika akaunti ya Gavana Mike Sonko.

Kulingana na stakabathi ambayo Meza yetu ya Uchumi na Biashara ilishuhudia ya mnamo Juni 30, 2016, Amaco iliingia kwenye mkataba na Arbab Auto Care, ambayo inamiliki gereji ambayo hukarabati magari ya serikali za kaunti.